मुद्दैमुद्दा खेपेका एमाले भोलेन्टियर फोर्स कमाण्डरको यस्तो धम्की

५ मंसिर २०८२ शुक्रबार, काठमाडौं । एमालेले शुक्रबार निकै तामझामका साथ घोषणा गरेको ‘नेसनल भोलेन्टियर्स फोर्स’को कमान्डर नै सात वटा फौजदारी मुद्दा लागेका व्यक्ति रहेको खुलासा भएको छ ।

एमाले अध्यक्ष केपी शर्मा ओलीको उपस्थितिमा नेता भानुभक्त ढकालले सिन्धुलीका पुष्पराज श्रेष्ठको नेतृत्वमा ११ सदस्यीय ‘नेसनल भोलेन्टियर्स फोर्स’को घोषणा गरेका थिए । जसको कमान्डर सिन्धुलीका श्रेष्ठ तोकिएका छन् ।

यसअघि नेकपा एमालेको युवा दस्ता युथ फोर्समा आबद्ध रहेका श्रेष्ठ भोलेन्टियर्स फोर्सको जिम्मेवारी पनि उनै श्रेष्ठले पाएका हुन् ।

प्रहरीको सीआरएस (क्रिमिनल रेकर्ड सिस्टम)मा श्रेष्ठविरुद्ध ज्यान मार्ने उद्योगदेखि अपहरणसम्मको मुद्दा चलेको भेटिएको छ ।

श्रेष्ठविरुद्ध ४ वटा ज्यान मार्ने उद्योगको कसुर, २ वटा सार्वजनिक अपराध (अभद्र व्यवहार) र १ अपहरण तथा शरीर बन्धकको कसुरमा मुद्दा चलेको भेटिएको प्रहरीले जनाएको छ । श्रेष्ठ २०६३ देखि अपराध कर्ममा संलग्न भएका हुन् ।

२०७५ मा सार्वजनिक अपराध, २०७३ मा ज्यानमार्ने उद्योग,२०६३ मा ज्यान मार्ने उद्योग, २०६४ मा पनि ज्यान मार्ने उद्योग, २०६७ मा सार्वजनिक अपराध र २०७० मा अपराध तथा शरीर बन्धक मुद्दा लागेको थियो । त्यसबाहेक २०६५ मा श्रेष्ठमाथि ज्यानमार्ने उद्योग अन्तर्गत प्रहरीले मुद्दा चलाएको थियो ।

लोकेसन हेरेका छौं, घर-घर घेर्छौं

नेसनल भोलेन्टियर्स फोर्सका संयोजक पुष्पराज श्रेष्ठले पार्टीले आशा गरेर दिएको जिम्मेवारी एक रत्ति पनि मर्न नदिने प्रतिबद्धता जनाएका छन् ।

उनले जस्तोसुकै अवस्थामा पनि सडकबाट मात्रै नभइ जहाँबाट पनि भिड्न तयार रहेको बताए ।

उनले भने-

-पार्टीले जुन आशा भरोसा गरेर हामीलाई एउटा जिम्मेवारी दिएको छ, त्यसलाई एक रत्ति पनि मर्न दिइने छैन ।

-हामी जस्तो अवस्थामा पनि टाउकोमा रातो कफन बाँधेर सडकबाट भने पनि सडकबाट, जहाँबाट लड्न भिड्न पनि तयार छौं ।

-यो सरकारलाई म चुनौती दिन चाहन्छु- यदि सच्चिएनौं भने हामीले तपाईंहरू जस्तो विरोध गर्छ, अवरोध गर्छ त्यसको प्रतिकार गर्छौं ।

-जसरी तपाईंहरूले लोकेसन ट्र्याक गरेर देखाउनुभएको छ, हामीले पनि तपाईंहरूको लोकेसन हेरेका छौं । हामी पनि तपाईंहरूको घर घर घेर्नेछौं ।