बालेनको विरोधमा दुर्गाको यस्तो बोली
२३ कात्तिक २०८२ आइतबार, काठमाडौं । मंसिर ७ गते आन्दोलनको घोषणा गरेका मातृभूमि बचाउ अभियानका प्रमुख दुर्गा प्रसाईले सुकुम्बासी बस्ती भत्काउन काठमाडौं महानगरका मेयर बालेन शाहको प्रयास सफल हुन नदिने बताएका छन् ।
आइतबार मनोहराको सुकुम्बासी बस्तीमा कोणसभा गर्दै दुर्गालेले बालेन र राजु पाण्डेविरुद्ध लड्न आफूले सहयोग गर्ने बताए ।
उनले बालेनमाथि विभिन्न आरोप लगाउँदै सुकुम्बासी बस्तीमा महानगरको डोजर आउनुभन्दा पहिले बालेनको घरमा पुगेर श्रीमती र परिवारलाई बाहिर निकाल्न उक्साए ।
प्रसाईले भने-
घर जलाउन र मान्छे निकाल्न उनीहरुले सिकाएका हुन् ।
तपाईंहरुकोमा भत्काउन आयो भने तपाईंहरु हुरुरु उसको घरतिर जानुस्, श्रीमतीलाई बाहिर निकाल्नुस् ।
तपाईंहरुको बच्चालाई निकाल्छ भने उसको बच्चामात्रै बच्चा हो ? उसको पनि भत्काउने हो ।
यो सरकारी जमिन बालेनको बाउको होइन र राजु पाण्डेको बाउको पनि होइन ।
जसले लछारपछार गर्छ उसको स्वास्नीलाई पनि लछारपछार गर्नुस् ।
अब छाड्ने होइन, मंसिर ७ को तयारीमा लाग्नुस् ।
दुर्गाले बालेनसँग मिलेर भिक्टर पौडेलले बब्लु गुप्तालाई मन्त्री बनाउन २ करोड रुपैयाँ खाएको आरोप समेत लगाए । दलहरुले सुकुम्बासीहरुलाइ भोट बैंक मात्र बनाएको बताउँदै उनले आफूले भोट नमाग्ने बरु सबैलाइ पक्की घर दिलाउन मद्दत गर्ने आश्वासन दिए ।
सुकुम्बासी बस्ती खाली गर्न महानगरले दिएको एक हप्ताको अल्टिमेटम आज सकिएको छ । अल्टिमेटम सकिएसँगै बस्ती खाली गराउने महानगरको योजना छ ।
