NPLको प्रसारण OTTमा, कति तिर्नुपर्छ पैसा ?

कात्तिक २७, २०८२ बिहिबार, काठमाडौं । नेपाल प्रिमियर लिग (NPL) को दोस्रो संस्करण ओटीटी (OTT) प्लेटफर्मबाट प्रत्यक्ष प्रसारण हुने भएको छ । पहिलो संस्करण युट्युबबाट प्रत्यक्ष प्रसारण भएकोमा दोस्रो संस्करण भने ओटीटीमा शुल्क तिरेर हेर्नुपर्ने भएको हो ।

नेपाल क्रिकेट संघ (क्यान) ले गरेको बोलपत्रमा भाग लिएर डिशहोमले प्रसारण अधिकार पाएको छ । डिशहोमको ओटीटी प्लेटफर्म ‘डिशहोम गो’ मार्फत भारतबाहेकका सबै मुलुकमा एनपीएलको प्रत्यक्ष प्रसारण हुनेछ ।

ओटीटीले दर्शकबाट उठाउनसक्ने अधिकतम शुल्क पनि क्यानले तोकिदिएको छ । जसअनुसार नेपालका दर्शकले ३०० रुपैयाँ, मध्यपूर्वका देशमा ५०० रुपैयाँ र अन्य देशका लागि १० अमेरिकी डलर शुल्क तोकिएको छ ।

एप र वेबसाइटबाट लाइभ खेल विज्ञापनरहित हुने डिशहोमले जनाएको छ । डिशहोम गो एप मोबाइल, एन्ड्रोइड टिभी र वेब तीनै माध्यममा उपलब्ध हुनेछ ।

दर्शकहरूले खल्ती, इसेवा, भिसा वा मास्टरकार्ड प्रयोग गरेर भुक्तानी गरी विश्वभरबाट सब्सक्रिप्शन लिन सक्नेछन् ।

साथै, डिशहोम गोको नयाँ संस्करण एप गुगल प्ले स्टोरमा उपलब्ध भएको छ । आईओएस (IOS) प्रयोगकर्ताका लागि नयाँ एप केही दिनमा लाइभ हुनेछ ।