- २०८२ वैशाख २१ आइतबार । काठमाडौं
गए रातिदेखि निरन्तर परेको वर्षाका कारण पूर्वपश्चिम राजमार्गको नारायणघाट-बुटवल सडक अवरुद्ध भएको छ ।
दाउन्ने क्षेत्रको सडकमा सवारीसाधन चिप्लिन थालेपछि सडक अवरुद्ध भएको हो ।
दाउन्ने क्षेत्रमा सडक विस्तारको काम भइरहेको छ ।
दाउन्ने खण्डमा राति ११:०० देखि बिहान ५:०० बजेसम्म दैनिक रूपमा सडक पूर्ण रूपमा बन्द गरिँदै आएको छ ।
यातायात बन्द भएपछि सवारीसाधनको लामो लाइन भएको छ ।
कान्ति लोकपथ सडक अवरुद्ध
वर्षाका कारण हेटौँडाबाट काठमाडौँ जाने कान्तिलोकपथ अवरुद्ध भएको छ ।
बागमती नदीमा बाढी आएको छ ।
कान्ति लोकपथअन्तर्गत मकवानपुरको भिमफेदी गाउँपालिका–८ र ललितपुरको बागमती गाउँपालिका–२ को सिमानामा रहेको बागमती खोला डाइभर्सन बाढीले बगाइदिएको छ ।
डाइभर्सन बगाएपछि आज बिहान ६:०० बजेदेखि सडक पूर्ण रूपमा अवरुद्ध भएको हो ।
अवरुद्ध सडक खुलाउने प्रयास जारी रहेको जिल्ला प्रहरी कार्यालयले जनाएको छ ।