२०८२ वैशाख १० बुधबार । काठमाडौं ।
भारतको जम्मुकश्मिरको पहलगाममा आतंककारीले गरेको आक्रमणमा २७ जनाको मृत्यु भएको छ ।
मंगलबार भएको आक्रमणमा एक नेपालीको समेत मृत्यु भएको छ ।
सुदीप न्यौपानेको मृत्यु भएको हो ।
उनको ठेगाना बुटवल उपमहानगरपालिका रुपन्देही हो ।
नेपालकी रेनु पाण्डे भाइते भएकी छिन्, उनको अवस्था स्थिर छ ।
मृतकमा बितन अधिकारीको नाम पनि छ ।
अधिकारी थर भएकाले कतिपयले दुई जना नेपालीको मृत्यु भएको भनेका छन् तर अधिकारीको देश खुलाइएको छैन ।
त्यसैले हालसम्म एक जना नेपालीको मृत्यु भएको पुष्टि भएको छ ।
पर्यटकहरुलाई लक्षित गरी भएको आक्रमणमा एक नेपाली, एक यूएई र दुई स्थानीयसहित २७ जनाको मृत्यु भएको भारतीय सञ्चार माध्यमले जनाएका छन् ।
पहलगामको बैसारन भन्ने ठाउँमा पर्यटकलाई लक्षित गरेर आक्रमण भएको थियो ।
बैसारन पहलगामबाट ६ किलोमिटर टाढा पर्दछ ।
बैसारन ठाउँ निकै सुन्दर भएकाले यसलाई ‘मिनी स्विटजरल्याण्ड’ भन्ने गरिन्छ ।
गोली प्रहार गरी हत्या
आतंकवादीहरुले पर्यटकलाई नियन्त्रणमा लिएर नाम सोधी–सोधी गोली हानेर मारेका हुन् ।
सैनिक पोशाकमा आएका ५ जना बन्दुकधारीले नाम र देश सोध्दै हिन्दू नाम भएका जतिलाई गोली हानेका थिए ।
मृत्यु हुनेहरुमा नेपाल र यूएईका नागरिकसहित भारतकै गुजरात, महाराष्ट्र, कर्नाटक, तमिलनाडु र ओडिशाका छन् ।
यसअघि सन् २०१९ फेब्रुअरीमा जम्मुकश्मिरको पुलवामा भएको आतकंकारी आक्रमणमा ४० भारतीय सैनिकको मृत्यु भएको थियो ।
भारतीय प्रधानमन्त्री नरेन्द्र मोदी साउदी अरब भ्रमणमा छन् ।
उनी भ्रमण कार्यक्रम छोट्याएर स्वदेश फर्किने छन् ।
नेपालले गर्यो निन्दा
प्रधानमन्त्री केपी शर्मा ओलीले भारतको जम्मुकश्मिरस्थित पहलगाममा भएको आतंकवादी आक्रमणको निन्दा गरेका छन् ।
प्रधानमन्त्री ओलीले आतंकवादविरुद्धको लडाइँमा भारतसँग दृढ ऐक्यबद्धता जनाउँदै यस्ता सबै किसिमका आतङ्कवादी कार्यको कडा निन्दा गरेका हुन् ।
ओलीले सामाजिक सञ्जाल लेखेका छन्-
-पहलगाममा भएको आतङ्कवादी आक्रमणमा परेका सबैप्रति गहिरो समवेदना प्रकट गर्दछौं ।
-नेपालले भारतसँग दृढ ऐक्यबद्धता जनाउँछ र सबै किसिमका आतङ्कवादी कार्यहरूको कडा निन्दा गर्दछ ।
-आक्रमणमा नेपाली नागरिक परेको आशङ्कासम्बन्धी रिपोर्टहरूका बारेमा नेपाल सरकार भारतीय पक्षसँग समन्वयमा रहेको छ ।
-पीडितमध्ये एक नेपाली नागरिक हुन सक्ने रिपोर्टबारे प्रमाणीत गर्न नजिकबाट समन्वय भइरहेको छ र आवश्यक सम्पूर्ण सहायता उपलब्ध गराइनेछ ।