- २०८२ वैशाख ७ गते काठमाडौं ।
नेपाली कांग्रेसका सभापति शेरबहादुर देउवा थाइल्यान्ड उडेका छन् ।
शेरबहादुर देउवा परिवारसहित आज थाइल्याण्डको राजधानी बैंकक गएका हुन् ।
शेरबहादुरसँगै परराष्ट्रमन्त्री आरजु राणा र छोरा-बुहारी पनि थाइल्यान्ड लागेका छन् ।
स्वास्थ्य उपचारको लागि सभापति देउवा थाइल्याण्ड गएको भनिएको छ ।
कांग्रेसका मुख्यसचिव कृष्ण पौडेलले भने-
-उहाँ स्वास्थ्य उपचारको लागि थाइल्याण्ड जान लाग्नुभएको हो ।
-यो उहाँहरूको पारिवारिक भ्रमण हो ।
-थाइल्याण्डमा देउवाको कुनै राजनीतिक भेटघाटको कार्यक्रम हुँदैन ।
भ्रमण अर्थपूर्ण
सत्ता गठबन्धनभित्र असन्तुष्टि बढिरहेको समयमा शेरबहादुर र उनकी पत्नी आरजु थाइल्यान्ड जानुलाई राजनीतिक वृत्तमा अर्थपूर्ण रूपमा हेरिएको छ ।
एमालेसँगको सहकार्यको ९ महिनामै कांग्रेसभित्र केपी ओली सरकारप्रति असन्तुष्टि बढ्दैछ ।
सत्ता गठबन्धनमा असन्तुष्टि बढिरहेको बेलामा माओवादी केन्द्रका अध्यक्ष प्रचण्डले शेरबहादुर प्रधानमन्त्री बने आफूहरू सघाउन तयार रहेको बताउँदै आएका छन् ।
कार्यवाहक सभापति खड्का
नेपाली कांग्रेसका सभापति शेरबहादुर देउवा देश बाहिर लागेपछि उपसभापति पूर्णबहादुर खड्काले कार्यवाहक सभापतिको जिम्मेवारी पाएका छन् ।
नेपाली कांग्रेसको विधान, २०१७ (संशोधन सहित) को धारा २५ को उपधारा (१३) बमोजिम स्वदेश नफर्कुन्जेलसम्म खड्कालाई पार्टीको कार्यवाहक सभापति तोकिएको हो ।