काठमाडौं । संगीतकार अर्जुन पोखरेलको संगीत रहेको नेपाली चलचित्र ‘पासवर्ड’ को ‘आजको साम बेबी’ गीतमा बलिउड अभिनेत्री सन्नी लियोनीले डान्स गर्ने भएकी छन् । सन्नीले उक्त गीत सुनेर आफू निकै उत्साहित रहेको भन्दै ट्विट समेत गरेकी छन् । उनले ट्वीटमा लेखेकी टन्, ‘बहु प्रतीक्षित नेपाली फिल्म पासवर्डमा समावेश एक डान्सिङ फ्लेभरको गीतसंग जोडिन पाउँदा म निकै खुसी छु ।
सन्नीको यो उत्साहित ट्विट प्रती प्रतिक्रिया दिँदै संगीतकार पोखरेलले भने , ‘पहिलो कुरा त सन्नी लियोनीले जुन सफलता बलिउडमा हाँसिल गरेर आफ्नो फ्यान फलोअर्स सर्कल बनाउनु भएको छ त्यो बिचमा ‘आउँदै गरेको नेपाली फिल्म’ भनेर सम्बोधन गर्दै ट्विट गर्नु नै हाम्रो लागि ठुलो कुरा हो । अर्को तर्फ हामी सिर्जना गर्ने मानिस हौँ । आफ्नो सिर्जनाको प्रसंसा हुँदा खुसी नहुने कुरै भएन । म गर्व गर्छु यो कुरामा कि हामीले ६० प्रतिशत मात्र सकेर पठाएको रअ फाइलले नै उहाँलाई यती धेरै उत्साहित बनाएछ । र अर्को कुरा ममा अझै चुनौती थपिएको छ, यो गीतको फाइनल आउटपुट उत्कृष्ट बनाउनका लागि । मलाई के लाग्यो भने हाम्रो सिर्जना पनि कसैको भन्दा कम रहेनछ । अवसर पाउने हो भने हामीले गरेका सिर्जनाले पनि उच्च पहिचान पाउने रहेछन् । आफ्नो छुट्टै पहिचान बनाउन सफल सन्नीको त्यो ट्विटले अझै धेरै उत्साहित बनाएको छ ।’
फिल्ममा कोरियोग्राफरका रुपमा रामजी लामिछानेले नै गीतमा कोरियोग्राफी गर्ने या भारतीय कोरियोग्राफर राख्ने भन्ने बिषयमा छलफल भइरहेको र टुंगो लाग्न बाँकी छ ।
अर्जुनको संगीत रहेको गीतमा दुर्गा खरेलको स्वर छ भने एरेन्ज महाराज थापाले गरेका हुन् । शब्द विक्रम जोशीको छ । जोशी फिल्मका निर्माता समेत हुन् । अमित बस्नेत र हिरल जोशीको समेत लगानी रहेको फिल्ममा छुल्ठिम गुरुङ, बुद्धि तामाङ, बिक्रान्त बस्नेत, रविन्द्र झा, प्रविण खतिवडा, लिशा सुनार, परी राना लगायतको अभिनय देख्न सकिनेछ । लण्डनसँगै बर्नमाउथ र ससेक्स लगायतका स्थानहरुमा फिल्मको सुटिङ गरिने छ । चलचित्र सौरभ लामाले खिच्नेछन् ।
२०१९ को सुरुवातमा रिलिज टार्गेट गरिएको फिल्ममा सन्निले एक आइटम दृश्य दिनेछिन् । सन्नीको चलचित्रमा केही सिन समेत समावेश गरिनेछ ।
